Með ungbarn í fanginu í framsæti
Níu ökumenn kærðir fyrir of hraðan akstur.
Lögreglan á Suðurnesjum hafði um helgina afskipti af erlendum ferðamönnum sem voru á ferðinni í umdæminu á húsbíl. Hélt farþegi í framsæti á ellefu mánaða barni í fanginu. Barnastóll var til staðar í bifreiðinni og lofaði parið að nota hann framvegis, eftir að lögregla hafði gert því grein fyrir alvarleika þessa framferðis. Fólkið greiddi sekt á staðnum.
Þá voru níu ökumenn kærðir fyrir of hraðan akstur. Sá sem hraðast ók mældist á 134 kílómetra hraða, þar sem hámarkshraði er 90 kílómetrar á klukkustund. Einn ökumannanna níu var ekki með ökuskírteini meðferðis.
Loks voru tveir sektaðir fyrir að leggja bifreiðum sínum ólöglega og skráningarnúmer voru fjarlægð af tveimur ótryggðum bifreiðum.
