Með forvitin augu á eldhúsglugganum!
Það eru oft ágætis pistlar skrifaðir inn á vefsíðu Reykjanesbæjar. Atli Már, íbúi í Höfnum sendir bæjaryfirvöldum línu og vekur athygli á mannlífinu og framkvæmdaleysi bæjaryfirvalda í Höfnum. Þá talar hann um ótrúlegan fjölda ferðamanna á vafri um þorpið og segir: „Ekki er óalgengt að fá meira að segja forvitin augu á eldhúsgluggan hjá sér á björtum sunnudegi þar sem maður situr á sloppnum að sötra kaffið sitt.“ Meðfylgjandi er pistill Alta og einnig svar forstöðumanns umhverfis- og tæknisviðs.Mig langar aðeins og skjóta hér inn á umræðuna nokkrum fyrirspurnum varðandi Hafnirnar. Ég bað fyrir nokkru (með símtali til áhaldahúss) um að sett yrðu upp skilti í Höfnum þar sem hámarkshraði sé tilgreindur, gott væri að fá upplýsingar um hvar það mál sé statt?Einnig hafa þrengingarnar á Hafnaveginum valdið talsverðu tjóni á bílum og miklum óþægindum, það eina sem þessar blessuðu þrengingar viðast gera að að auka hraðann á bílum á leið í gegnum þorpið, er ekki möguleiki á að láta fjarlægja þessar þrengingar og fá einfaldlega hraðahindranir?
Nú hef ég búið hér í Höfnum í tæp 3 ár og líkar það vel, það sem hefur kannski komið mér mest á óvart er hið ótrúlega magn af ferðamönnum sem koma hingað í öllum veðrum og á ótrúlegustu tímum, megnið af þessu fólki virðist hingað komið til að skoða sæfiskasafnið en eitthvað virðist sú skoðun taka stuttan tíma því stærsti hluti þessara ferðamanna eyða mestum tíma sínum hér í að skoða þorpið, fjöruna og jafnvel hestana sem eru hér oft á beit. Ekki er óalgengt að fá meira að segja forvitin augu á eldhúsgluggan hjá sér á björtum sunnudegi þar sem maður situr á sloppnum að sötra kaffið sitt.. :)
Vegna þessa þá hef ég spurningar, hefur engum í bæjarstjórn hugkvæmst að gera Hafnir meira aðlaðandi fyrir þessa ferðamenn (og íbúa)? framkvæmdir hérna á þeim 3 árum sem ég hef búið hér eru svo gott sem engar, aldrei hef ég séð vinnuhóp á vegum Reykjanesbæjar hér framkvæma fegrunaraðgerðir á þorpinu, það eina sem gerst hefur er að einn veggur á kirkjunni hérna var klæddur,
Væri ekki hægt að fá 5-10 manna hóp hingað í sumar til að hreinsa t.d. fjörurnar, umhverfið, mála ljósastaura og brunahana og fleira sem myndi gera þorpið meira aðlaðandi?
Einnig eru lóðarmörk flestra húsana hér við götur mjög subbuleg, þá á ég við vegna þess að engar gangstéttir eru hér, og erfitt er því að reyna að mynda einhver skynsamleg mörk lóðar og götu, væri möguleiki á að fá þó ekki væri kantsteina hingað?
Ég hef heyrt stundum að Hafnir hafi slæmt orð á sér, og ástæðan virðist vera að hér hafi fyrr á tímum búið misefnilegt fólk, oft á framfæri sveitarfélagsins, það sem ég sé hér nú er mikið af ungu fólki sem er að gera upp gömlu húsin og eyðir miklum tíma og fjármunum í það verk, en það pirrar marga hér veit ég aðgerðarleysi bæjarstjórnarinnar.
Með kveðju
Atli Már.
Höfnum
Forstöðumaður umhverfis- og tæknisviðs.
Umræddur Hafnavegur er þjóðvegur og heyrir undir vegagerðina, nokkur umræða hefur verið um þrengingar sem á veginum eru við Hafnir og ekki allir samála um hvað er best í þeim efnum. En þínum athugasemdum verður komið til Vegagerðarinnar.
Þjónustumiðstöð Reykjanesbæjar mun sjá um vorhreinsun og umhirðu, til dæmis slátt og þess háttar.
Ljóst er að Hafnir skulu fá sömu þjónustu og önnur svæði bæjarins.
Atvinnu- og markaðsskrifstofa er að skoða fjölda mála hvað varðar uppbyggingu fyrir ferðamenn á svæðinu, þ.m. hvað varðar Sæfiskasafnið.
