Matvæli frá herstöðinni verða líklega brennd

Útlit er fyrir að Varnarliðið þurfi brenna tugi tonna af fyrsta flokks matvælum, sem nú eru í stórmörkuðum og frystigeymslum á Keflavíkurflugvelli, í stað þess að fá að gefa þau íslenskum sjálfseignarstofnunum sem vinna að líknarmálum.

Talað er um að matvælabrennan mikla verði í sorpeyðingarstöðinni í Helguvík undir eftirliti íslenskra lögreglumanna, svo ekki sleppi kjötflís í munn hungraðs Íslendings, segir á visir.is í dag.
Stórmarkaðnum Navy Exchange,verður lokað eftir þrjár vikur en fullu vöruframboði verður haldið þangað til.
Þar er mikið af niðursuðuvörum og frystum vörum í hæsta gæðaflokki að kröfum atvinnuhermanna og frystar nautalundir, kalkúnar og annað kjötmeti er í tuga tonna birgðum í svonefndri Coldstore, sem sér mötuneytum og klúbbum fyrir vistum.

Að sögn kunnugra er þetta gríðarlegt magn og mikil verðmæti, en talsmenn varnarliðsins fengust ekki í morgun til að tjá sig um málið. Neitun um að fá að gefa matvælin mun þó vera komin úr landbúnaðarráðuneytinu, segir á visir.is


Mynd: Spurning hvort ilmandi matarlykt muni leggja yfir svæðið þegar matvæli í miklu magni frá Vellinum verða brennd í Kölku?