Málmsletta orsök bruna í United Silicon

Málmur slettist á vörubretti og því varð eldur laus í kísilverksmiðju United Silicon í Helguvík um kvöldmatarleyti í gær. Þetta kom fram í máli Helga Þórhallssonar, forstjóra fyrirtækisins, á opnum fundi umhverfis- og samgöngunefndar Alþingis í morgun. „Málmsletta fór á trébretti sem eru í geymslu sem á að vera mjög vel skorðuð frá ofninum sjálfum. Þar eru geymdar rekstrarvörur,“ sagði hann.

Mikinn reyk lagði frá verksmiðjunni við brunann og var slökkvilið Brunavarna Suðurnesja kallað til. Starfsmönnum hafði tekist að slökkva eldinn áður en slökkvilið kom á vettvang en slökkviliðsmenn slökktu í glæðum á gólfi verksmiðjunnar.

Enginn slys urðu á fólki í brunanum og sagði Helgi tjónið óverulegt og ekki hafa haft áhrif á starfsemi kísilverksmiðjunnar.