Magnesíumverkefnið í gang aftur eftir 18 mánuði

Næstu 18 mánuðir verða mjög rólegir hjá Íslenska magnesíumfélaginu. Ástralskir samstarfsaðilar íslenska félagsins eru að byrja á 96.000 tonna verksmiðju sem hefur framleiðslu 2004–5. Að mati Ástralanna þarf næsta verksmiðja á eftir þeirra verksmiðju að hefja framleiðslu um 2009. Miðað við þriggja ára byggingartíma og tveggja til þriggja ára undirbúning þarf að hefja starfið um áramót 2003–4, segir Júlíus Jónsson hjá Hitaveitu Suðurnesja hf.Þann 30. janúar var haldinn aðalfundur Íslenska Magnesíumfélagsins hf. Á fundinum vor tveir fulltrúar Ástralska magnesíumfélagsins þeir Ian Hartnell og Richard Hill og sögðu þeir frá stöðu mála í magnesíumheiminum. Segja má að skilaboð þeirra hafi verið bæði jákvæð og neikvæð.

Jákvæða hliðin er sú, að samstarfsaðilar okkar í Ástralíu hafa lokið þróun tiltölulega nýrrar og hagkvæmrar tækni sem þykir um leið mun umhverfisvænni en hingað til hefur verið ráðandi við slíka framleiðslu. Þeir hafa fengið öll leyfi, m.a. eftir gagngera yfirferð Green Peace yfir allt ferlið, og hafa einnig lokið fjármögnun 96.000 tonna verksmiðju sem framkvæmdir hefjast við á næstu 1–2 mánuðum. Allt ytra umhverfi, mat á umhverfisáhrifum, fjármögnun o.s.frv. ætti því að vera mun aðgengilegra hér á landi í ljósi þessara staðreynda.

Neikvæða hliðin er hinsvegar sú, að markaðsmálin hafa á síðustu misserum þróast mjög á verri veg, sérstaklega vegna mikils framboðs frá Kína. Heimsmarkaðurinn hefur verið 350–400 þús. tonn og nú flytja Kínverjar út 170–180 þús. tonn á ári og selja langt undir framleiðslukostnaði á vesturlöndum.
Verksmiðjum hrfur verið lokað, bæði í Noregi og í N–Ameríku, þar eð þær geta ekki keppt við framleiðslu þar sem lítið þarf að huga að umhverfismálum og starfsmannafjöldi og launakostnaður eru ekki stórmál. Framtíðin liggur í aukinni notkun bílaframleiðenda á magnesíum og því þarf að vinna að þróun og tækniframförum á því sviði því bílaframleiðendur verða að fá gæðavöru með trygga og örugga afhendingu sem byggð er á langtímasamningum, og þar verður kínversk framleiðsla vart samkeppnisfær miðað við núverandi aðstæður.
Eins og Ástralirnir meta stöðuna nú þarf næsta verksmiðja, eftir að þeirra 96.000 tonna verksmija hefur framleiðslu 2004–5, að hefja framleiðslu um 2009.

Miðað við þriggja ára byggingartíma og tveggja til þriggja ára undirbúning þarf að hefja starfið um áramót 2003–4, þannig að útlit er fyrir að félagið láti lítið fyrir sér fara næstu 18 mánuði eða svo. Markaðsmálin eru þó að sjálfsögðu í stöðugri endurskoðun og geta þessar áætlanir þá breyst, en varlegast að reikna frekar með að árin 2002–3 verði mjög róleg hjá félaginu, segir Júlíus Jónsson forstjóri Hitaveitu Suðurnesja á vef fyrirtækisins.