Maggi Kjartans og Marína Ósk hlutu verðlaun á íslensku tónlistarverðlaununum
Íslensku tónlistarverðlaunin voru veitt í gær við hátíðlega athöfn í Hörpu og áttu Suðurnesjabúar sína fulltrúa, Magnús Jón Kjartansson hlaut heiðursverðlaun íslensku tónlistarverðlaunanna og Marína Ósk Þórólfsdóttir átti tónverk ársins í flokki jazztónlistar.
Magnús Jón Kjartansson, eða Magga Kjartans eins og hann er oftast kallaður, þarf vart að kynna fyrir landsmönnum og hvað þá Suðurnesjafólki. Hann ólst upp í Keflavík og var hluti af hinni rómuðu bítlakynslóð. Hann var í mörgum af vinsælustu hljómsveitum íslenskrar popp- og rokktónlistarsögu, samdi aragrúa tónlistar fyrir hina og þessa tónlistarmenn, t.d. Vilhjálm Vilhjálmsson og lék lengi í Hemma Gunn þáttunum auk þess að spila nokkrum sinnum í viku í nokkur ár á Hótel Sögu. Síðast en ekki síst var Maggi brautryðjandi í réttindamálum íslenskra tónlistarmanna og átti þátt í stofnun ýmissa hagsmunafélaga í þeim málum.
Marína Ósk Þórólfsdóttir er ung og efnilega tónlistarkona sem hefur verið í tónlist frá því að hún var tveggja ára gömul má segja. Hún byrjaði ferilinn á blokkflautu en við fermingaraldurinn lærði hún á gítar og þar með upphófst sköpun hennar. Hún hefur gefið út tvær sólóplötur, komið að gerð annarra og von er á fleiri plötum.
Í spilaranum hér að neðan, eru viðtöl við Magga og Marínu í Suðurnesja magasíni.
