Mældist á 141 km hraða á Reykjanesbraut
-Fjórtán aðrir kærðir fyrir of hraðan akstur
Tæplega fertugur ökumaður mældist á 141 km hraða á Reykjanesbraut í gær en viðkomandi hafði aldrei öðlast ökuréttindi. Var þetta í annað sinn sem lögreglan á Suðurnesjum hafði afskipti af ökumanninum undir stýri.
Auk hans hefur lögregla kært 14 ökumenn fyrir of hraðan akstur á síðustu dögum. Sá sem hraðast ók mældist á 164 km hraða þar sem hámarkshraði er 90 km á klukkustund. Þess ökumanns bíður 130.000 króna fjársekt, svipting ökuleyfis í einn mánuð og þrír refsipunktar í ökuferilsskrá.
Loks voru fjórir ökumenn handteknir vegna gruns um fíkniefnaakstur.
