Maður dæmdur í 10 mánaða fangelsi fyrir að misnota tvær stúlkur

Karlmaður var dæmdur í 10 mánaða fangelsi í Héraðsdómi Reykjaness í gær fyrir að hafa misnotað tvær stúlkur kynferðislega á árinu 2000 til 2002. Voru þær 6-8 ára er brotin voru framin. Hann var dæmdur til að borga hvorri um sig 300.000 krónur í miskabætur.
Sannað þótti - þrátt fyrir eindregna neitun ákærða - að maðurinn hafi sumarið 2002 brotið gegn annarri stúlkunni á vinnustað sínum í Njarðvík. Ennfremur að hann hafi á árinu 2000 eða 2001 brotið gegn stúlku fæddri 1993 í bílskúr í Sandgerði og í bíl við Garð.

Dómur Héraðsdóms Reykjaness var fjölskipaður og þótti dómnum brot mannsins gegn stúlkunum tveimur alvarleg og beinast að mikilvægum hagsmunum. Hann hafi notfært sér ungan aldur þeirra til þess að misnota þær kynferðislega. Af gögnum málsins megi  ráða að stúlkurnar hafi orðið fyrir áfalli en þeim hafi tekist með hjálp fagaðila að vinna sig út úr vandanum þannig að brot ákærða gagnvart þeim valdi þeim ekki teljandi erfiðleikum í daglegu lífi.  Það er þó álit sérfræðinga Barnahúss að þær þurfi á aðstoð fagaðila að halda er þær komi á unglingsárin og fari að leggja annan skilning á atburðina.

Maðurinn var dæmdur til að borga allan kostnað sakarinnar, þar með talin málsvarnarlaun verjanda síns og þóknun réttargæslumanna stúlknanna, samtals 540 þúsund krónur.