Lögreglan sýnileg við upphaf ferðahelgar

Lögreglan í Keflavík er mjög sýnileg nú við upphaf stærstu ferðahelgar ársins. Lögreglubílar eru víða á ferðinni. Þannig mætti vegfarandi fjórum lögreglubílum á Reykjanesbraut á kaflanum milli Njarðvíkur og Hafnarfjarðar fyrr í dag.
Skúli Jónsson, varðstjóri hjá lögreglunni í Keflavík, sagði að stöðugt umferðareftirlit verði á Reykjanesbraut í dag, enda sé það vilji lögreglunnar að hraða sé haldið niðri og umferðin gangi vel fyrir sig.
Þrír lögreglumenn úr lögregluliði Keflavíkur verða á þjóðhátíð í Eyjum við löggæslustörf um helgina. Að sögn Skúla hefur þetta ekki áhrif á löggælsu hér á svæðinu, þar sem um sé að ræða menn í sumarfríum sem taki aukavaktir í Eyjum.
Lögreglan mun verða með öflugt eftirlit á Suðurnesjum um helgina. Þegar margir eru að heima fara oft innbrotsþjófar á stjá. Þá á að reyna að stöðva.