Lögregla rannsakar eignaspjöll í Sandgerði
– eignatjónið umtalsvert
Lögreglan á Suðurnesjum hefur nú til rannsóknar brot sem snúa að eignaspjöllum og innbrotum sem komið hafa upp í Sandgerði að undanförnu. Þetta staðfestir Gunnar Schram, yfirlögregluþjónn hjá lögreglunni á Suðurnesjum. Hann segir að í sumum tilvikum er eignatjónið umtalsvert.
Í samtali við Víkurfréttir segir Gunnar að upplýsingar hafi borist um líklega gerendur í málunum og yfirheyrslur hafa farið fram varðandi hluta þessara mála.
Á samfélagsmiðlum í Sandgerði hefur mátt sjá óánægjuraddir varðandi ítrekuð eignaspjöll í bænum og að lítið sé aðhafst í þeim málum. Gunnar segist hafa heyrt af þeim röddum. „Við erum að reyna að bregðast við þeim,“ sagði Gunnar.
