Lögbannsbeiðni vísað til Héraðsdóms Reykjaness

Úrskurður fulltrúa sýslumannsins í Keflavík um beiðni Garðs um að lagt verði lögbann við því að DS flytji hjúkrunarrými hjá Garðvangi að hjúkrunarheimilinu Nesvöllum í Reykjanesbæ var til umræðu á fundi bæjarráðs Sveitarfélagsins Garðs í morgun.

Í úrskurði sýslumanns er beiðni um lögbann hafnað með vísan til 2. mgr. 24. gr. laga nr. 31/1990. Lagt var fram bréf frá Forum lögmönnum til Sýslumannsins í Keflavík dags. 26. febrúar 2014, þar sem fram kemur krafa um að synjun sýslumanns um lögbannsbeiðnina verði vísað til Héraðsdóms Reykjaness.

Bæjarráð samþykkir samhljóða á fundi sínum í morgun að staðfesta kröfu um að niðurstöðu sýslumanns um lögbannsbeiðni verði vísað til Héraðsdóms Reykjaness.

Fram kom að bæjarstjóri hafi sent bréf til heilbrigðisráðherra með ósk um að flutningi hjúkrunarrýma frá Garðvangi til Nesvalla verði frestað meðan málið er í dómsmeðferð. Tillaga um þetta var lögð fram í stjórn DS í gær en var hafnað af stjórn DS.