Logandi rusl

Það hefur verið fremur rólegt hjá Brunavörnum Suðurnesja frá áramótum að sögn Jóns Guðlaugssonar, varaslökkviliðsstjóra BS. Liðið fór í fjórtán sjúkraflutninga og níu brunaútköll, öll minniháttar.

Eldur á verkstæði
Vatnsrör sprakk í kjallara Heiðarskóla sl. fimmtudag. Mikil gufa myndaðist en ekki er vitað hversu mikið tjón hlaust af. BS dældi vatninu upp með þar til gerðum tækjum. Degi síðar var tilkynnt um eld í gaskút á verkstæði við Hafnarbraut í Njarðvík. Þegar slökkviliðsmenn komu á staðinn höfðu starfsmenn náð að skrúfa fyrir gasið. Engin hætta var á ferðum. Á laugardaginn var kveikt í rusli á bakvið Valgeirsbakarí í Njarðvík í annað sinn á skömmum tíma. Sem betur fer logaði eldurinn við gluggalausa hlið hússins.

Eldvarnir í skólum
Verkefnaskrá Eldvarnareftirlits Brunavarna Suðurnesja er þétt skipuð næstu vikurnar en framundan er kennsla í brunavörnum í leikskólum, skólum, fyrirtækjum og stofnunum. „Við byrjum á að fara í nýja leikskólann okkar, Hjallatún, og fræða starfsfólk þar um brunavarnir“, segir Jón Guðlaugsson. „Síðan förum við í Hæfingarstöðina, aðra leikskóla, grunnskólana og svo framvegis. Næstu vikur hjá okkur munu fara í þessa vinnu.“