Loftrýmisgæsla Atlantshafsbandalagsins við Ísland hefst að nýju

Loftrýmisgæsla Atlantshafsbandalagsins við Ísland er að hefjast að nýju með komu flugsveitar ítalska flughersins. Alls munu um 140 liðsmenn flughersins taka þátt í verkefninu auk starfsmanna frá stjórnstöð NATO í Uedem, Þýskalandi (Combined Air Operations Center). Flugsveitin kemur til landsins með fjórar Eurofighter Typhoon F-2000 orrustuþotur.

 

Gera má ráð fyrir aðflugsæfingum að varaflugvöllum á Akureyri og Egilsstöðum á tímabilinu 6. til 12. september.

 

Verkefnið verður framkvæmt með sama fyrirkomulagi og fyrri ár og í samræmi við loftrýmisgæsluáætlun NATO fyrir Ísland. Flugsveitin verður staðsett á öryggissvæðinu á Keflavíkurflugvelli.  Ráðgert er að verkefninu ljúki í byrjun október.

 

Landhelgisgæsla Íslands sinnir framkvæmd verkefnisins samkvæmt samningi sem gerður var við utanríkisráðuneytið á grundvelli varnarmálalaga nr. 34/2008. Að auki er verkefnið unnið í samvinnu við Isavia.