Lítill áhugi fyrir innanlandsflugi til Suðurnesja

Reykjavíkurflugvöllur nýtur mests stuðnings sem framtíðarmiðstöð innanlandsflugs samkvæmt nýrri skoðanakönnun DV. Einungis 8% voru óákveðin eða neituðu að svara. Vísir.is greinir frá.Mjög góð svörun var í könnuninni sem fram fór sunnudaginn 28. janúar og tóku 552, eða 92% kjósenda í 600 manna úrtaki, afstöðu til spurningarinnar: Hvar vilt þú að miðstöð innanlandsflugs verði í framtíðinni? Könnunin náði til alls landsins og var úrtaki skipt jafnt á milli höfuðborgarsvæðis og landsbyggðar, sem og á milli kynja.

Fjórir kostir
Spurt var um fjóra kosti um val á flugvallarstæði og framtíðarmiðstöð fyrir innanlandsflugið.

A - á núverandi Reykjavíkurflugvelli.
B - á nýjum flugvelli á Lönguskerjum.
C - á nýjum flugvelli á Vatnsleysuströnd og
D - á Keflavíkurflugvelli.

Ef skoðað er hlutfall þeirra sem afstöðu tóku til þessara kosta kemur í ljós að 48,6% kjósenda á öllu landinu vilja áfram hafa miðstöð innanlandsflugs á núverandi Reykjavíkurflugvelli. Þá vilja 27,5% að flugvöllurinn verði fluttur á nýjan flugvöll á Löngusker í Skerjafirði. Einungis 9,2% telja nýjan flugvöll á Vatnsleysuströnd vera besta kostinn og 15,7% vilja flytja miðstöð innanlandsflugs á Keflavíkurflugvöll.

Ef litið er á heildarúrtakið, þá vilja 44,7% hafa miðstöðina á Reykjavíkurflugvelli. Þeir sem vilja nýjan flugvöll á Lönguskerjum teljast vera 25,3%. Aðeins 8,5% af heildarúrtakinu vilja nýjan flugvöll á Vatnsleysuströnd og 13,5% vilja flytja miðstöð innanlandsflugs til Keflavíkur. Óákveðin voru 5,8% og 2,2% neita að svara þessari spurningu.

Íbúar landsbyggðar og höfuðborgarsvæðis sammála
Núverandi Reykjavíkurflugvöllur og nýr flugvöllur á Lönguskerjum njóta greinilega mestrar hylli kjósenda. Flestir kjósenda, bæði á höfuðborgarsvæði og á landsbyggð, eru fylgjandi áframhaldandi miðstöð innanlandsflugsins á núverandi Reykjavíkurflugvelli. Þó er afstaðan meira afgerandi á landsbyggðinni. Þar velja 54,3% af heildarúrtakinu áfram Reykjavíkurflugvöll en 17,7% vilja flytja aðstöðuna út á Löngusker. Á höfuðborgarsvæðinu eru 35% fylgjandi núverandi aðstöðu en 33% vilja flytja hana út á Löngusker.

Mun minna fylgi er með öðrum hugmyndum. Þannig nýtur nýr flugvöllur á Vatnsleysuströnd aðeins fylgis 11% á höfuðborgarsvæðinu og 6% á landsbyggðinni. Flutningur miðstöðvar innanlandsflugsins til Keflavíkurflugvallar nýtur 13,3% fylgis á höfuðborgarsvæðinu og 13,7% fylgis á landsbyggðinni. Óákveðin reyndust 6% á höfuðborgarsvæði en 5,7% á landsbyggðinni. Þeir sem neituðu að svara spurningunni voru 1,7% á höfuðborgarsvæði og 2,7% á landsbyggðinni.

Hlutföll afstöðu kynjanna til þessa máls eru mjög áþekk því sem að framan greinir. Þó er heldur fleiri karlar á höfuðborgarsvæðinu hlynntari flugvelli á Lönguskerjum en núverandi Reykjavíkurflugvelli. Konur á höfuðborgarsvæðinu taka aftur á móti núverandi Reykjavíkurflugvöll fram yfir nýjan völl á Lönguskerjum.

Á landsbyggðinni er mjög lítill munur á afstöðu kynjanna til þeirra fjögurra kosta sem greidd voru atkvæði um.

Hreinn meirihluti í þrem flokkum
Þegar litið er á afstöðu fólks eftir því hvaða flokka það kýs þá er hreinn meirihluti innan Framsóknarflokks, Sjálfstæðisflokks og Frjálslynda flokksins fyrir vali á núverandi Reykjavíkurflugvelli sem framtíðarmiðstöð innanlandsflugs. Það er 50,9% hjá kjósendum Framsóknarflokks, 56,5% hjá kjósendum Sjálfstæðisflokks og 62,5% hjá kjósendum Frjálslynda flokksins. Næstbesti kostur hjá kjósendum þessara þriggja flokka er nýr flugvöllur á Lönguskerjum með 30,2% fylgi B-lista
fólks, 21% fylgi D-lista-fólks og 37,5% fylgi F-lista-fólks. Reyndar greinist ekki fylgi F-lista-fólks við aðra kosti. Hjá Framsóknarflokki velja síðan 13,2% Keflavíkurflugvöll og 5,7% velja nýjan völl á Vatnsleysuströnd. Hjá Sjálfstæðisflokki velja 14,5% Keflavíkurflugvöll og 8% velja nýjan flugvöll á Vatnsleysuströnd.

Flest S-lista-fólk velur einnig Reykjavíkurflugvöll
Hjá Samfylkingunni er afstaðan til þeirra fjögurra valkosta sem boðið var upp á nokkuð blendnari. Flestir kjósendur Samfylkingar velja þó Reykjavíkurflugvöll, eða 31,7%. Næstflestir velja nýjan flugvöll á Lönguskerjum, eða 28,6%. Þá kemur Keflavíkurflugvöllur með 20,6% og síðan nýr flugvöllur á Vatnsleysuströnd sem fær 19% fylgi samfylkingarfólks.

VG jafnhlynntir tveimur kostum
Hjá stuðningsmönnum Vinstrihreyfingarinnar - græns framboðs eru nákvæmlega jafn margir sem velja Reykjavíkurflugvöll og nýjan flugvöll á Lönguskerjum, eða 39,3%. Þar á eftir hugnast VG-fólki best að hafa miðstöð innanlandsflugs á Keflavíkurflugvelli, eða 14.3%. Lakasti kostur að mati stuðningsmanna vinstri-grænna er nýr flugvöllur á Vatnsleysuströnd sem fær aðeins 7,1% stuðning.