Listamannaspjall í Listasafni Reykjanesbæjar

Um helgina lýkur einkasýningu Guðrúnar Einarsdóttur á Listasafni Reykjanesbæjar og af því tilefni mun listamaðurinn verða á staðnum sunnudaginn 5. mars kl. 15:00 og ræða við gesti um verk sín.

Á sýningunni gefur að líta yfir tuttugu ný verk eftir Guðrúnu sem unnin eru með olíu á striga ásamt skúlptúrum unnum úr frauðplasti og litarefni á tré. 

Sýningin hefur hlotið frábæra dóma og m.a. segir Þóra Þórisdóttir listgagnrýnandi Morgunblaðsins;” Hér er einhver tilfinning fyrir nautnafullum leik með mörk og samspil yfirborðs og kviku sem ítrekar og upphefur greinarmun á náttúru og menningu.  Sýningin er því sannkölluð veisla…….”

Guðrún Einarsdóttir hefur hlotið viðurkenningu sem einn af okkar áhugaverðustu listamönnum í dag og var m.a. einn af fulltrúum Íslands á Carnegie Art Award 1999. 

Sýningin er opin alla daga frá kl. 13:00 - 17:30 og er staðsett í sýningarsal Listasafnsins í Duushúsum, Duusgötu 2-10 í Reykjanesbæ. 

Af vef Reykjanesbæjar