Listamaður lýsir Garðinn upp

Listamaðurinn Lisa Marie Kaftori frá Kaliforniu hefur undanfarna daga unnið að því að afhenda öllum íbúum í Garði lítil ljós og er hugmyndin að fólk setji þau út í glugga á laugardagskvöld. Hún er einn fimmtíu listamanna sem taka þátt í alþjóðlegu listahátíðinni Ferskum vindum sem nú stendur yfir í Garði. 

Undanfarna daga hefur Lisa notið liðsinnis barna í Garði sem gengið hafa í hús og afhent íbúum lítil ljós. Hún segir mörg börn hafa tekið þátt í verkinu og hjálpað sér við dreifingu ljósanna. „Áður en ég kom á listahátíðina komst ég að því að í Garði búa um 1400 manns og mér tókst að útvega 1500 ljós og tók með mér hingað. Það var byrjunin á verkinu. Ég er alltaf með ljósin með mér og hef afhent fólki á förnum vegi. Þetta er falleg leið til að tengjast án orða. Flestir hér tala reyndar ensku en ég er hrifin af þessari hugmynd að geta tengst fólki án tungumáls á táknrænan hátt. Svo á laugardagskvöld þegar fólk verður með ljósin úti í glugga tengjumst við öll,“ segir Lisa sem hefur einnig beðið fjölskylduna sína heima í Santa Barbara til að kveikja á ljósi í glugga á laugardagskvöld.

Verkið ber heitið Bylgjur sjónarhorna + bylgjur ljóss og að sögn Lisu er hugmyndin að baki verkinu að skapa tengingar. „Sjávarföll eru þema Ferskra vinda. Enska orðið er „tides“ og ég komst að því að það á sér norrænar rætur. Mig langaði mikið til að koma með ljós í Garð og mundi þá að tæknin að baki blue LED ljósa var fundin upp í háskólanum í Santa Barbara þar sem ég bý. Þá áttaði ég mig á því að ég gæti bókstaflega komið með ljós frá Santa Barbara í Garð,“ segir Lisa. Með ljósinu hefur hún einnig afhent fólki lítið spjald með kíkjugati á sem hugmyndin er að nota til að sjá heiminn í öðru ljósi. Á spjaldinu eru upphafsorð úr Vísum Vatnsenda-Rósu sem er í miklu uppáhaldi hjá Lisu. 

Fá skemmtilegar spurningar frá börnum

Lisa fór ásamt japanska listamanninum Tokyo Maruyama í heimsókn í grunnskólann í Garði á dögunum og saman unnu þau að listsköpun með nemendum 4. til 10. bekkjar. Tokyo hafði safnað efnisbútum frá heimilum í Garði og nemendurnir hjálpuðu honum að gera úr þeim 400 metra langt reipi. „Þetta var skemmtileg samvinna hjá okkur og nemendunum. Svo fengu þau ljós afhent á eftir.“ Lisa segir samstarfið með nemendunum hafa verið einkar skemmtilegt og að þau hafi fengið margar skemmtilegar spurningar frá þeim. Í dag hitta þau svo nemendur leikskólans í Garði.

Ferskum vindum lýkur í næstu viku en þeir hafa staðið frá 15. desember. Lisa segir það hafa verið mjög ánægjulegt að taka þátt og dvelja í Garði. „Það hefur skapast góður andi meðal listamannanna og við höfum mikið unnið saman. Fólkið í Garði er mjög hlýtt, opið og áhugasamt um okkur listamennina. Garður er svo fallegur staður. Ég á eftir að sakna umhverfisins þegar ég fer heim til Santa Barbara.“

Nú um helgina verður leiðsögn um sýningar Ferska vinda og hefst hún klukkan 14:00 í sýningarsal við Sunnubraut 4 á laugardag og sunnudag. Farið verður með rútu um bæinn og er aðgangur ókeypis.