Lífeyrissjóðir Suðurnesja og Suðurlands sameinast

Ákveðið hefur verið að sameina Lífeyrissjóð Suðurnesja og Lífeyrissjóð Suðurlands og freista þess þannig að byggja upp einn sterkan sjóð í stað hinna tveggja.
Stefnt er að því að sameiningin taki gildi þann 1. júlí næstkomandi og munu eignir og skuldbindingar Lífeyrissjóðs Suðurlands renna til Lífeyrissjóðs Suðurnesja og mun hinn sameinaði sjóður heita Lífeyrissjóður Suðurlands.

Skrifstofa LS í Reykjanesbæ mun þá yfirtaka alla starfsemi og skuldbindingar LSL gagnvart  félögum sjóðsins og annast greiðslu lífeyris og alla þjónustu við félaga. Stefnt er að því að réttindi félaga í LSL muni frá þeim degi verða hin sömu og þau réttindi sem félagar LS njóta nú.

Í tilkynningu frá sjóðunum kemur fram að umhverfi lífeyrissjóða á Íslandi hafi breyst mikið á undanförnum árum. Nýjar reglugerðir, auknar arðsemiskröfur, samkeppni og hert eftirlit hafa aukið verulega þær kröfur sem gerðar eru til starfsemi lífeyrissjóða.
Því hófu stjórnir sjóðanna viðræður á haustmánuðum í þeim tilgangi að kanna hvort að hagsmunum sjóðfélaga gæti hugsanlega verið best borgið með formlegri sameiningu sjóðanna tveggja og varð það niðurstaðan.

Stjórnir  Lífeyrissjóðs Suðurlands og Lífeyrissjóðs Suðurnesja hafa í hyggju að byggja upp sterkan sjóð sem staðið getur af sér áföll og verið sjóðfélögum sínum traustur bakhjarl.