Lenti með veikan farþega

Airbus A330 farþegaþota bandaríska flugfélagsins Northwest Airlines á leið frá Amsterdam til Minneapolis millilenti á Keflavíkurflugvelli á þriðja tímanum í dag með veikan farþega. Öryggisviðbúnaður var á flugvellinum við lendingu vélarinnar sem hlaðin var eldsneyti til langferðar og því umtalsvert þyngri en venjan er.  Farþeginn var fluttur frá borði og á sjúkrahús. Flugvélin tók viðbótareldsneyti, enda dýrt spaug að þurfa að millilenda á svo langri leið, og er  búist við að hún haldi áfram för sinni síðdegis.