Leikskólinn Sólborg lokaður og allir í hraðpróf

Leikskólinn Sólborg í Sandgerði er lokaður í dag. Fjórir starfsmenn fengu jákvæða niðurstöðu á heimaprófi sem þeir tóku vegna einkenna og einn til viðbótar er með einkenni. Þetta kemur fram í tilkynningu til foreldra barna í skólanum í gær.

„Þar sem þessir kennarar fengu ekki einkenni fyrr en í morgun [sunnudagsmorgun] þá förum við sem vorum í skólanum á föstudag, bæði kennarar og börn, í smitgát. Þið skráið börnin í smitgát og farið í hraðpróf á fyrsta og fjórða degi. Það er opið í hraðpróf á HSS á morgun mánudag milli kl. 10.00-11.30,“ segir í tilkynningunni frá leikskólanum.

Beðið er með að opna skólann þar til niðurstaða fæst úr hraðprófum og staðan verður tekin um hádegi í dag. Sólborg er því lokuð í dag.

Foreldrar eru hvattir til að láta vita ef börnin eru smituð. Þá eru allir hvattir til að fara varlega.

Hér eru reglur um smitgát:
https://www.covid.is/undirflokkar/smitgat