Laun kjörinna fulltrúa í Garði hækka um 26%

Tillaga um þóknun til kjörinna fulltrúa bæjarstjórnar Sveitarfélagsins Garðs var samþykkt samhljóða á fundi bæjarráðs Garðs í síðustu viku. Eftirfarandi tillaga var lögð fram um breytingar á launakjörum kjörinna fulltrúa:  

 

„Í kjölfar þess að Kjararáð hækkaði þingfararkaup þann 1. nóvember 2016, hefur verið til skoðunar hvernig leiðrétta skuli launakjör kjörinna fulltrúa sveitarfélagsins. Þróun launakjara hefur fylgt þróun þingfararkaups. Þess í stað er lagt til að breytingar á launakjörum kjörinna fulltrúa taki mið af þróun launavísitölu.  

 

Ef miðað er við þróun launavísitölu í stað þingfararkaups, hækki föst mánaðarlaun kjörinna fulltrúa í bæjarstjórn Garðs um 26%, í stað 44,3% ef miðað væri við ákvörðun Kjararáðs þann 1. nóvember 2016. Breyting þessi taki gildi frá og með 1. janúar 2017. Föst mánaðarlaun kjörinna fulltrúa í bæjarstjórn munu framvegis uppreiknast eftir þróun launavísitölu og fer útreikningur fram þann 1. janúar ár hvert. Um launakjör kjörinna fulltrúa fer eftir tillögu um þóknun kjörinna fulltrúa og nefndalaun.“