Landgangurinn við Leifsstöð rifinn

Gert er ráð fyrir að byrjað verði að rífa landgang flugstöðvarinnar þriðjudaginn 21. febrúar þegar búið verður að koma fyrir „stokki“ eða bráðabirgðalandgangi til hliðar, ofan á gólfplötu 2. hæðar nýrrar viðbyggingar, fyrir farþega sem eru á leið úr landi eða inn í landið. Gamli landgangurinn verður fjarlægður á um 40 metra kafla næst flugstöðinni til að skapa rými fyrir viðbygginguna. Jafnframt verður leið farangursvagna breytt og þeim ekið eftir gólfplötu 1. hæðar nýbyggingarinnar út á flughlöðin.

Hafnar eru framkvæmdir við að byggja yfir gönguleiðir milli flugstöðvarinnar og langtímastæða fyrir bíla. Þá eru hafnar framkvæmdir við loftstokk í suðvesturhorni 1. hæðar (nálægt söluskrifstofu Icelandair við innritunarsal). Starfsfólk verður óhjákvæmilega fyrir einhverjum óþægindum meðan þetta gengur yfir en slíkt tilheyrir, því miður.