Lækningatæki seld af HSS og starfsfólk ritskoðað?
Þær hugmyndir voru reifaðar á fundi heilbrigðisráðuneytisins með framkvæmdastjórn Heilbrigðisstofnunar Suðurnesja að selja tæki og áhöld til að minnka skuldir ríkissjóðs. Tæki sem sumhver voru gjafir frá góðgerðarsamtökum á Suðurnesjum. Þetta fullyrðir Hanna Björg Konráðsdóttir í harðorðri grein sem birtist á vef Víkurfrétta nú í kvöld.
Þá segir einnig í grein Hönnu Bjargar: „Álfheiður Ingadóttur hefur sett starfsmönnun stofnunarinnar stólinn fyrir dyrnar og bendir allt til þess að það sé ritskoðun í gangi. Hún hefur spurst fyrir um starfsmenn og reynt að draga úr því að þeir tjái sig um málefni stofnunarinnar og gagnrýnt skrif þeirra“.
Og Hanna bætir við: „Það getur hver maður séð að heilbrigðisráðherra heldur starfsmönnun stofnunarinnar í gíslingu og þessi vinnubrögð eru með öllu ólýðræðisleg. Veit undirrituð ekki betur en hún [Álfheiður Ingadóttir] hafi í broddi fylkingar staðið fyrir utan Alþingi og hrópað háðsyrði og skammarorð um þing er hún sjálf starfaði á. Aðspurð sagði hún að; „það að vera kjörinn á þing tekur ekki af mönnum stjórnarskrárvarinn rétt til þess að lýsa skoðunum sínum hvort heldur í orði eða með þátttöku í friðsamlegum mótmælum.? Nú spyr ég Álfheiður Ingadóttir, hefur þú einkarétt á stjórnarskrárvörðu tjáningarfrelsi? Er þín túlkun á lýðræði á einn veg, eða þannig að þín skoðun sé sú eina rétt og aðrar skoðanir séu að vettugi virtar.
