Kvikan kemur af enn meira dýpi

Nýjar efnagreiningar frá Jarðvísindadeild HÍ hafa leitt í ljós breytingar í efnasamsetningu kvikunnar sem er að koma upp í Fagradalsfjalli. Nú þegar rúmur mánuður er liðin síðan gosið hófst hefur hlutfall á milli efnasambandanna K2O/TiO2 í kvikunni farið hækkandi. Eldfjalla- og náttúruvárhópur Suðurlands greinir frá þessu og vísar til heimildar Edward Marshall, vísindamanns við Jarðvísindadeild Háskóla Íslands.

Þessar breytingar eru taldar til marks um að kvikan sem nú er að koma upp sé að koma af enn meira dýpi í möttli jarðar heldur en sú sem kom í upphafi eldgossins. Einnig þykir þessi breyting benda til þess að kvikan hafi myndast við minni hlutbræðslu möttuls, samanborið við kvikuna sem kom upp í upphafi eldsumbrotana.