Kveiktu í bæjarbrennunni í Grindavík

Á annað hundrað manns stóðu að ólöglegri brennu í Grindavík í nótt. Lögreglan var með mikinn viðbúnað þar sem talið var, samkvæmt fyrri reynslu, að reynt yrði að kveikja brennu í óleyfi í kringum miðnætti.

Það varð raunin því undir miðnætti fór fólk að safnast saman en til að byrja með var reynt að stafla upp brennu við Saltfisksetrið. Lögreglu tókst að stöðva það og flutti efnið á brott.

Í framhaldi af því var kveikt í bæjarbrennunni við Litluvör. Slökkviliði tókst ekki að slökkva eldinn í brennunni og brann hún að mestu leiti niður. Einnig var kveikt lítil brenna við Sólarvé en þar safnaðist hópur fólks saman, líklega á annað hundruð manns skv. lögreglu, á aldrinum 20-30 en það vakti athygli lögreglu hversu margir fullorðnir menn stóðu að þessu og allmargir ekki undir áhrifum áfengis.

Slökkviliðið slökkti í brennunni en mætti talsverðri mótspyrnu við það og kalla þurfti til lögreglu. Hún hafði afskipti af nokkrum aðilum og voru tveir handteknir en sleppt síðar um nóttina.

Það var veðrinu að þakka að ekki fór verr því það tók að versna og leystist þá hópurinn upp og lauk aðgerðum lögreglu upp úr klukkan 02:00. Lögreglan var með sex bifreiðir á vettvangi þegar mest var.

Skemmdir  virðast ekki hafa orðið verulegar en óljóst er hversu vel tekst til að hlaða nýja áramótabrennu en þetta er í fimmta sinn á jafnmörgum árum sem fólk safnast saman í Grindavík á jólunum og reynir að kveikja brennu.