Krefjast áframhaldandi gæsluvarðhalds

Lögreglan á Suðurnesjum hefur óskað eftir framlengingu á gæsluvarðhaldi yfir pólskum karlmanni, sem er grunaður um að hafa orðið valdur að dauða 4 ára drengs í Keflavík sl. föstudag. Þá var ekið á drenginn á Vesturgötu í Keflavík og stungið af frá vettvangi slyssins.

Drengurinn, Kristinn Veigar Sigurðsson, lést af áverkum sem hann hlaut í slysinu. Pólverjinn, sem lögregla grunar um verknaðinn, var handtekinn sl. laugardag við sérstakt eftirlit lögreglunnar. Hann var síðan í Héraðsdómi Reykjaness dæmdur til gæsluvarðhalds sem rann út í dag kl. 16. Maðurinn hefur verið leiddur aftur fyrir dómara og framlengingar varðhalddsins krafist til loka næstu viku. Enn er beðið niðurstöðu dómara.