Kór FS syngur í Duus-húsum í kvöld

Kór Fjölbrautaskóla Suðurnesja heldur klukkustundar langa söngskemmtun í Duus húsum í Keflavík í kvöld 25. nóv. kl. 20. Aðgangur er ókeypis og öllum heimill á meðan húsrúm leyfir.

Kórinn starfar í tveimur hlutum. Kór 1 syngur einraddað. Stjórnandi hans er Kjartan Már Kjartansson. Á efnisskrá hans eru létt lög, bæði íslensk og erlend. Undirleikari á hljómborð er Guðbrandur Einarsson.
Kór 2 fæst við fjölraddaðan söng og stjórnandi hans er Ingi Garðar Erlendsson.

Þetta er í fjórða sinn sem kórinn stendur fyrir söngskemmtun sem þessari og hafa undirtektir alltaf verið mjög góðar. Foreldrar, ættingjar og vinir kórfélaga eru sérstaklega hvattir til þess að mæta á söngskemmtunina.