Kona með 100 grömm af kókaíni í endaþarmi

Kona sem smyglaði tæplega 100 grömmum af kókaíni í endaþarmi sínum til landsins í fyrra hefur verið dæmd í 4 mánaða skilorðsbundið fangelsi í Héraðsdómi Reykjaness.

Konan var að koma frá Amsterdam í Hollandi þegar hún var handtekin á Keflavíkurflugvelli með 92,1 grömm af kókaíni falin í endaþarmi sínum. Ónefndur maður sem einnig var ákærður í málinu mun hafa aflað efnanna í Hollandi og komið þeim fyrir í endaþarmi konunnar sem smyglaði þeim að beiðni mannsins. Fram kemur í dómnum að hægt hefði verið að framleiða um 405 grömm af kókaíni úr því magni sem smyglað var inn miðað við 79 prósent styrkleika.

Maðurinn sem aflaði efnanna mætti ekki þegar málið var þingfest þar sem ekki hafði tekist að birta honum fyrirkall í Danmörku þar sem hann var búsettur. Síðar bárust upplýsingar um að hann væri ekki lengur búsettur þar.

Konan játaði sök í málinu og var mál hennar og mannsins aðskilið og hún dæmd í 4 mánaða skilorðsbundið fangelsi. 99,2 grömm af kókaíni voru gerð upptæk og henni gert að greiða 388 þúsund krónur í sakarkostnað.