Komið með Gunnþór GK vélarvana til Njarðvíkur

Fiskiskipið Gunnþór GK frá Njarðvík varð vélarvana tvær sjómílur fyrir utan Sandgerði um þrjúleytið í dag. Björgunarskipið Hannes Þ. Hafstein var kallað til aðstoðar og tók það Gunnþór í tog.

Farið var með skipið til Njarðvíkur og sóttist ferðin seint þar sem foráttubrim og þungur sjór hömluðu för. Björgunarskipið kom til Njarðvíkur með Gunnþór GK rétt fyrir kvöldmat og aðstoðaði hafnsögubáturinn Auðunn við að koma Gunnþóri GK að bryggju.