Komast allir að í Vinnuskóla Reykjanesbæjar

Berglind Ásgeirsdóttir yfirmaður hjá Vinnuskóla Reykjanesbæjar segir að í ár séu um 300 starfsmenn í Vinnuskólanum, þar af eru um 250 krakkar á aldrinum 14-16 ára. „Hér komast allir að og ennþá eru laus pláss á B-tímabili ef einhverjir hafa áhuga,“ segir Berglind.

Hún segir að aðsóknin í Vinnuskólann sé minni en í fyrra en Berglind telur að fjölbreytt störf séu í boði fyrir unglinga í Reykjanesbæ. Vinnuskólinn hefur nýlega komið sér fyrir í nýju húsnæði á efri hæðinni í Reykjaneshöll, en ýmsar nýjungar eru einnig fyrirhugaðar í starfsemi skólans. Sérstakur forvarnardagur verður haldinn í fyrsta sinn í sumar, þar sem Sigga Dögg kynfræðingur verður m.a. með kynfræðslu fyrir unglingana, eins sem boðið verður upp á kennslu við gerð ferilskrár.

Vinnuskólinn ætlar svo að standa fyrir myndaleik þar sem birtar eru fyrir og eftir myndir af vinnu unglingana. Vegleg verðlaun verða þar í boði fyrir hópa en hér að neðan má sjá nokkrar myndir sem þegar hafa verið sendar inn á facebook-síðu Vinnuskólans.

Leikurinn gengur út á að birta fyrir og eftir myndir og sýna afrakstur vinnunnar.

Hér hefur verið tekið til hendinni.