Kleifarvatn hefur minnkað um tvo ferkílómetra

Kleifarvatn heldur enn áfram að minnka og er nú um tveim ferkílómetrum minna að flatarmáli en það var fyrir jarðskjálftana 17. júní 2000. Um síðustu mánaðamót mældist yfirborð vatnsins vera í 136,3 metrum yfir sjó. Flatarmál vatnsins hefur minnkað um tvo ferkílómetra, eða úr 10 í 8 ferkílómetra. Hefur rúmtak vatnsins minnkað um 30 gígalítra síðan 17. júní 2000 að sögn Kristjönu G. Eyþórsdóttur, jarðfræðings hjá Vatnamælingum Orkustofnunar. Engar rannsóknir eru þó í gangi um hvert vatnið fer.

Haukur Jóhannesson, jarðfræðingur hjá Orkustofnun, segir hverasvæði við suðaustanvert vatnið, sem DV greindi frá í október, hafa verið þekkt áður, þó það hafi yfirleitt verið undir vatni. Hann segir að enn eigi eftir að koma upp mjög öflugt hverasvæði undan Syðristapa um mitt vestanvert vatnið.

Ekki er nákvæmlega vitað hversu djúpt er niður á það svæði. Haukur segir eðli hverasvæða sem þessara vera að þau séu stöðugt að breytast. Þannig sé greinilegt að heldur hafi dregið úr Austurengjahvernum sem myndaðist í jarðskjálftum 1924. Það var mjög öflugur leirhver, en á sama tíma og af honum dregur hafi komið upp þessir öflugu leirhverir við sunnanvert vatnið.

Í þessu sambandi minnast menn sprengingar í borholu sem varð á Krýsuvíkurhverasvæðinu í nóvember 1999. Sú sprenging er þó að sögn Hauks ekki talin hafa orsakast af hitabreytingum, heldur vegna þess að borholan hrundi og stíflaðist ofarlega. Safnaðist þá upp mikill þrýstingur sem endaði með öflugri sprengingu. Þar eyðilagðist m.a. skúr við borholuna. Má enn sjá greinileg ummerki sprengingarinnar enda skvettist grár leirinn yfir stórt svæði. Kristjana G. Eyþórsdóttir, jarðfræðingur hjá Vatnamælingum Orkustofnunar, segir að enn renni niður um sprungur í Kleifarvatni. Úrkoma að undanförnu haldi þó eitthvað í við minnkun vantsins. Hún segir að reynt hafi verið að bera þetta saman við grunnvatnsstöðu í Heiðmörk, en engin tengsl munu sjáanleg þar á milli. Kristjana segir engar markvissar mælingar vera í gangi á grunnvatnsstöðu svæðisins í heild. Ekki er heldur vitað með fullri vissu hvert vatnið sem nú lekur úr Kleifarvatni fer. Kristjana segir að í raun sé ekki annað til um það mál en svokölluð Straumsvíkurskýrsla Freysteins Sigurðssonar frá 1976. Þar er talað um að vatnið leiti undir Undirhlíðar og niður í átt að Straumsvík og eins suðaustur úr vatninu.

Engar mælingar hafa þó verið gerðar á því nú hvort um aukið rennsli er að ræða undan hrauninu við Straumsvík.

Vísir.is greinir frá í dag.