Klæðnaður og vopn bankaræningja

Rannsóknardeild lögreglunnar í Keflavík heimilaði í dag fjölmiðlum að mynda klæðnað þann sem bankaræninginn klæddist í gær þegar hann rændi útibú Landsbanka Íslands í Grindavík. Ræninginn var klæddur bláum þykkum samfestingi sem af útlitinu að dæma virðist eiga uppruna sinn í smiðju. Þá bar hann græna lambhúshettu með götum fyrir augu, var í fingravettlingum frá NorHand, sem smiðjumenn þekkja einnig og var vopnaður búrhnífi með um 20 sm. löngu blaðiMaðurinn stökk yfir afgreiðsluborð og ógnaði þar gjaldkera með hnífi sem forðaði sér í var út úr bankanum ásamt öðrum starfsmanni og tilkynnti þar um ránið til lögreglu. Maðurinn fór í gjaldkerakassa og hafði þar með sér peninga sem hann bar út í plastpoka. Ekki verður uppgefið hve mikla fjármuni maðurinn hafði með sér. Maðurinn sást síðan hlaupa til austurs frá bankanum og hvarf sjónum starfsmanna.
Lögreglan lokaði á skömmum tíma öllum undankomuleiðum frá Grindavík og skömmu síðar eða kl. 13:12 stöðvaði lögreglan fólksbifreið á Reykjanesi á veginum til Hafna og handtók þar 19 ára gamlan mann sem gat passað við lýsingu á brotamanninum. Hann var þó ekki klæddur þeim fatnaði sem ránsmaðurinn hafði verið í hann mun hafa klætt sig úr samfestingnum og ekkert þýfi fannst í bílnum. Góðar myndir fengust úr eftirlitsmyndavélum í Landsbankanum og hjálpuðu þær til við rannsókn málsins.
Hóf þá lögreglan umfangsmikla leit að þýfinu með aðstoð leitarhunda og björgunarsveitamanna sem kallaðir voru til aðstoðar. Sporhundur rakti slóð ræningjans frá bankanum að bifreiðaplani skammt frá þar sem ætla má að hann hafi farið upp í bifreið. Þýfið fannst síðan í svartri tösku í vegkantinum nærri Reykjanesvita, en brotamaðurinn mun hafa hent töskunni frá sér út úr bílnum þegar hann sá til aðgerða lögreglunnar. Við yfirheyrslur hjá lögreglu hefur sá handtekni gengist við ráninu og vísaði á stað þar sem hann hafði hent frá sér samfestingnum, lambhúshettunni,skónum og hnífnum sem var eldhúshnífur sem var með ca. 20 cm. löngu blaði.
Maðurinn var færður fyrir Héraðsdóm Reykjaness þar sem hann gekkst við brotinu og að beiðni lögreglu var hann úrskurðaður í gæsluvarðhald til 7. júní kl. 15:00.


Myndin: Fatnaður bankaræningjans ásamt vopni sem hann bar við ránið. VF-mynd: Hilmar Bragi Bárðarson