Kirkjan færð í upprunalegt horf fyrir 100 ára afmælið

Keflavíkurkirkja fagnar 100 ára afmæli árið 2015 og til að fagna þeim tímamótum er spennandi starf komið í gang innan kirkjunnar sem m.a. miðar að því að færa kirkjuna í upprunalegt form, svo langt sem hægt er að fara með það verkefni miðað við nútíma þarfir og af því að kirkjan sjálf hefur stækkað í báða enda, ef svo má að orði komast. Þannig er komið nýtt anddyri á kirkjuna og KÓRINN (sem er svæðið í kringum altarið) er einnig í síðari tíma viðbyggingu.

Kirkjunni hefur oft verið breytt í gegnum tíðina en þær innréttingar sem nú eru í henni eru frá lokum 7. áratugarins og eru eftir teikningum Ragnars Emilssonar arkitekts.

Meðal þess sem gert var má nefna að söngloftið, sem var úr tré, var rifið burt. Nýja söngloftið er eins stórt og framast er kostur vegna gluggaskipunar, bogadregið að framan og steinsteypt, nema hvað ofan á bogadreginni steinbríkinni er eikarhandrið.

Mynd að ofan: Svona er upprunalegt útlit Keflavíkurkirkju. Farið verður eins nálægt því og hægt er með nútíma þarfir í huga.

Þá voru nýjar grátur og predikunarstóll smíðuð í stíl við veggþiljurnar. Í kirkjuna komu nýir bólstraðir kirkjubekkir. Þeir voru að stærstum hluta gjöf frá Systrafélagi Keflavíkurkirkju, sem stofnað var 12. mars 1965. Einnig voru allar hurðir endurnýjaðar nema útihurðirnar. Lýsingu kirkjunnar var gerbreytt. Sett var upp tvöföld röð af ljósakrónum, fjórar í hvorri röð. Gömlu ljósakrónurnar þrjár, sem aflagðar voru við stækkunarframkvæmdirnar, voru svo settar upp að nýju fyrir jólin 1974. Kirkjan var svo endurvígð árið 1967.

Fyrsta steinda glerlistaverkið sem kirkjan eignaðist er í hringglugganum á framhlið kirkjunnar. Verkið er enskrar gerðar frá 1968. Steindu gluggana í kirkjuskipinu og kór kirkjunnar teiknaði Benedikt Gunnarsson listmálari. Þeir voru gerðir í Þýskalandi í samráði við Benedikt og voru settir í kirkjuna árið 1977.

Breytingin á kirkjunni á þessum tíma var mjög róttæk og breytti algjörlega svip Keflavíkurkirkju að innan. Fyrir breytingarnar var oft talað um það að Keflavíkurkirkja væri ein fallegasta kirkja landsins að innan. Fyrir þessar breytingar þótti kikjan svo stílhrein og að birtan flæddi inn um gluggana. Breytingarnar voru hins vegar barn síns tíma.

Nú er sem sagt vilji til þess innan Keflavíkurkirkju að hverfa aftur til upprunalegs útlits og er í gangi vinna sem miðar að því að finna liti sem notaðir voru þegar kirkjan var vígð 1915. Helstu breytingar verða þær að panell fer af veggjum, gráturnar við altarið verða í upprunalegu útliti, gamli predikunarstóllinn verður færður í upprunalegt útlit, skipt um gólfefni í kirkjunni og bekkir færðir í upprunalegt horf en hafðir þægilegir að sitja á. Þá munu steindir gluggar verða teknir úr kirkjunni og sett í hana venjulegt gler til að hleypa inn náttúrulegu ljósi. Þá verður upprunalegur litur settur á ramma altaristöflunnar og upprunalegi predikunarstóllinn fær sinn sess að nýju.

Mynd að ofan: Sr. Skúli S. Ólafsson sóknarprestur Keflavíkurkirkju við predikunarstólinn sem verður endurgerður í upprunalega mynd. Englarnir eru t.a.m. ekki hluti af upprunalegum stól.

Ragnheiður Ásta Magnúsdóttir, formaður sóknarnefndar Keflavíkurkirkju, sagði í samtali við Víkurfréttir að nauðsynlegt viðhald væri aðkallandi og því yrði tækifærið notað til að koma kirkjunni í upprunalegt útlit. Panelklæðningin frá 1965 sé orðin þurr og skemmdir á nokkrum stöðum. Bekkir þurfi viðhald og gólfefni séu orðin lúin.

Þá segir Ragnheiður Ásta að gamli predikunarstóllinn sé til og hann sé geymdur í Kirkjulundi. Hann eigi sér mikla sögu og því sé honum gerð mikil virðing með því að taka hann í notkun að nýju.
Kostnaður við þessar breytingar er talinn vera um 10 milljónir króna og nú sé unnið að því að afla þess fjár. Þá liggur fyrir að orgel kirkjunnar er að syngja sitt síðasta og sú stund færist nær að það mun hreinlega hrynja. Orgelið er gamalt og verksmiðjuframleitt í Austur-Þýskalandi á sínum tíma en er ekki eins og orgel í dag, sem eru sérsmíðuð inn í hverja kirkju.

„Okkur langar að sýna kirkjunni þá virðingu sem henni ber,“ segir Ragnheiður Ásta í samtali við blaðamann. Til þess að breytingarnar geti orðið að veruleika verður að gera þær í nokkrum skrefum. Breytingarnar hófust fyrir tveimur árum þegar panelklæðning var tekin úr kórnum, hann var málaður og altaristaflan var hreinsuð. Núna í ágúst verður kirkjunni lokað í einn mánuð, þar sem engin brúðkaup verða í ágústmánuði. Panell verður tekinn af veggjum og þeir málaðir, bekkir verða teknir út úr kirkjunni og endurnýjaðir, auk þess sem skipt verður um gólfefni. Að ári verður síðan farið í að laga kirkjuloftið og laga gráturnar. Í framhaldinu verður síðan farið í að setja upp gamla predikunarstólinn.

Mynd að ofan: Séð inn eftir Keflavíkurkirkju. Útlitið á eftir að breytast mikið og kirkjan verður mun bjartari.

Ragnheiður Ásta segir að þegar litið er til sögunnar þá hafi Keflavíkurkirkja verið byggð af miklum stórhug. Stærstur hluti kirkjunnar var gefinn af kaupmanninum á staðnum en einnig lögðu bæjarbúar til bæði vinnuframlag og fjármuni til byggingarinnar. Nú er einnig horft til þess að bæjarbúar í Keflavíkursókn leggi til vinnu og fjármuni til kirkjunnar sinnar. Stórhugurinn á sínum tíma var svo einstakur. Þá bjuggu á fimmta hundrað manns í sveitarfélaginu en þeir byggðu kirkju sem tók 200 manns í sæti. Núna geta bæjarbúar lagt fjármuni til verksins t.a.m. með því að kaupa pípu í nýja orgelinu eða leggja fram vinnu einn og einn dag.

Séra Skúli S. Ólafsson sóknarprestur segir að hugmyndin sé að virkja hinn mikla félagsauð sem er innan kirkjunnar til góðra verka. Þá hefur kirkjan fengið hinn færa arkitekt, Pál V. Bjarnason til verksins. Hann hefur að sögn legið yfir teikningum og gömlum ljósmyndum af kirkjunni. Þá hefur hann farið ofan í alla gamla muni sem hafa varðveist úr kirkjunni til að finna upprunalega liti. Þannig er búið að finna liti á tréverki og bútur af upprunalegum gólfdúk fannst í gamla predikunarstólnum, þannig að þar geta menn fengið sama lit og áferð.

Mynd að ofan: Þessir steindu gluggar munu verða teknir niður og settir í geymslu og/eða gerðir sýningarhæfir á öðrum stað.

Steindir gluggar kirkjunnar verða teknir niður og þeim komið í geymslu. Þá hefur Keflavíkurkirkja aðstöðu til að hafa þá til sýnis áfram, a.m.k. að hluta. Sýnist fólki svo að steindu gluggana eigi að setja upp að nýju, þá sé alltaf möguleiki á því. Þannig verði gengið frá þeim að þeir verði varðveittir. Ragnheiður Ásta segir að sóknarnefndarfólk sé spennt að sjá hvernig kirkjan líti út án steindu glugganna. Steindir gluggar hafi á sínum tíma verið mikil tískubóla í mörgum kirkjum. Steindu gluggarnir í Keflavíkurkirkju hafa enga trúarlega skírskotun.

Stefnt er að því að hafa lokið þeim áfanga sem nú verður unninn fyrir Ljósanótt og bjóða gestum úr árgangagöngunni að koma við í kirkjunni og njóta þeirra breytinga sem þá verða tilbúnar.