Keilir vill taka við af Lögregluskólanum

Keilir er einn fjögurra háskóla hér á landi sem hafa lýst yfir vilja á að taka að sér að kenna lögreglunám á háskólastigi. Þetta kemur fram á vef RÚV. Hinir háskólarnir eru Háskólinn í Reykjavík, Háskólinn á Bifröst og Háskólinn á Akureyri. Fyrirhugað er að gera breytingar á lögreglunámi og myndi einhver háskólanna þá taka við af Lögregluskólanum næsta haust.

Hjálmar Árnason, framkvæmdastjóri Keilis, sagði í viðtali við RÚV að þar sem skólinn hafi ekki rekstarleyfi sem háskóli myndi námið þar vera í samstarfi við Háskóla Íslands, sem er stærsti eigandi Keilis.