Keflavíkurflugvöllur opinn - 330 á leið til Mexíkó eftir glaðan dag í Reykjanesbæ

Búið er að opna að nýju fyrir flugumferð um Keflavíkurflugvöll. Von var á flugvél Iceland Express til Keflavíkur frá Tenerife strax klukkan 18 og í kvöld klukkan 21 er von á flugvél félagsins þangað frá Kaupmannahöfn.

Síðar í kvöld, eða klukkan 21:20, er von á þremur flugvélum Icelandair frá Glasgow og klukkan 22 á flugvél Iceland Express frá Gatwick í Lundúnum að lenda á vellinum.

Þá er Airbus A330 þota frá HiFly loks að komast frá Keflavíkurflugvelli í kvöld með 330 farþega til Mexíkó. Farþegar vélarinnar, starfsmenn tölvuleikjafyrirtækisins CCP, munu hafa gert sér glaðan dag í Reykjanesbæ í dag á meðan beðið var eftir því að Keflavíkurflugvöllur opnaðist fyrir flugi að nýju.

Mynd: Flugvél HiFly á Keflavíkurflugvelli og komst ekki neitt vegna lokunar vallarins. VF-mynd: Hilmar Bragi Bárðarson