Kanna jarðhitavon nærri þéttbýli

Nýlokið er borun tveggja svonefndra hitastigulshola á Miðnesheiði á vegum Hitaveitu Suðurnesja hf.. Sú fyrri er rúmlega 500 m djúp, og var hún boruð í síðasta mánuði fyrir ofan byggðina í Keflavík. Sú seinni er 278 m djúp, og lauk borun hennar í síðustu viku. Jarðborinn Azi frá Jarðborunum hf. hefur verið notaður til verksins. Nú er unnið að fóðrun beggja holanna með grönnum stálrörum til hitamælinga. Niðurrennsli á köldu grunnvatni niður í vatnsgæf jarðlög neðar kemur í veg fyrir að réttur
hitastigull fáist, og því er nauðsynlegt að hindra niðurrennslið með fóðringum og
steypingum. Að verki loknu verða holurnar hitamældar og fæst þá marktækur hitastigull. Niðurstaðna er að vænta síðar á árinu.

Í fyrra var ein hola boruð í sama skyni nærri Sandgerði (við Rockville), en holurnar sem boraðar voru í haust eru rétt ofan við Njarðvík og Keflavík.
Tilgangur með borununum er að kanna hvort einhver jarðhitavon sé nærri
þéttbýlissvæðunum. Viðnámsmælingar, sem HS fékk Orkustofnun til að framkvæma fyrir nokkrum árum, hafa sýnt útbreidda viðnámslægð á borsvæðinu.
Viðnámslægðin gæti bent til, að lághitasvæði sé undir og mætti hugsanlega nýta það með dælingu úr djúpum borholum, hvort heldur væri til beinna nota eða þá sem varaafl.