Kaldalóns í Grindavík
-söngvaskáldið og héraðslæknirinn á menningarviku
Tónleikar til heiðurs söngvaskáldinu Sigvalda Kaldalóns voru fluttir á Menningarviku í Grindavík í dag en tónleikarnir eru liður í tónleikaröðinni Söngvaskáld á Suðurnesjum sem flutt hefur verið í Hljómahöll að undanförnu.
Flutt voru þekkt lög Sigvalda eins og Hamraborgin, Ísland ögrum skorið, Ég lít í anda liðna tíð og að sjálfsögðu einkennislag Suðurnesja, Suðurnesjamenn. Sagt var frá ævi og tónlist Sigvalda og þá sérstaklega Grindavíkurárunum en hann starfaði sem héraðslæknir Keflavíkurlæknishéraðsí 16 ár.
Heiðursgestir tónleikanna voru barnabörn Kaldalóns, Sigvaldi Snær og Gréta Kaldalóns en margir tónleikagesta mundu eftir tónskáldinu ljúfa og konu hans, hjúkrunarkonunni Karen Margrethe Mengel-Thomsen.
