Jákvæður tónn og málið líklega samþykkt á næsta fundi

Ég er hlynntur þessu verkefni og sé ekkert því til fyrirstöðu að afgreiða málið en virði það að Umhverfis- og skipulagsráð bæjarins hafi viljað fara betur yfir málin. Svona óvissa getur haft slæm áhrif en ráðið mun klára sína afgreiðslu og síðan bæjarstjórn í framhaldinu. Ég hef trú á því að við samþykkjum verkefnið á bæjarstjórnarfundi 2. júní,“ sagði Gunnar Þórarinsson, oddviti Fráls afls, í umræðum um málefni kísilvers Thorsils á bæjarstjórnarfundi í Reykjanesbæ á þriðjudag.

Málefni Thorsils hafa verið í eldlínunni að undanförnu og í síðustu viku var farin mótmælaganga og bæjarstjórn hvött til að samþykkja ekki breytingu á deiliskipulagi vegna kísilversins og efna til íbúakosninga vegna málsins. Umhverfis- og skipulagsráð fékk sendar 287 athugasemdir til sín þar sem langflestir hafa áhyggjur af of mikilli mengun frá verinu í Helguvík. Síðasti fundur ráðsins stóð yfir í 4 klukkustundir og endaði á því að meirihluti þess samþykkti að fresta afgreiðslu málsins og efna til aukafundar 27. maí um málið áður en það yrði afgreitt til bæjarstjórnar.

Miklar umræður urðu um þessi mál á fundi bæjarstjórnar í vikunni. Sjálfstæðismenn höfðu áhyggjur af töfum en Friðjón Einarsson, formaður bæjarráðs, sagði að aldrei fyrr hafi svo margar athugasemdir borist í einu máli hjá bæjarstjórn.

Tónninn gagnvart málefninu var þó jákvæður og ekki var  hægt að greina annað en að það fái jákvæða afgreiðslu á næsta fundi bæjarstjórnar 2. júní.