Íþróttaakademían hlýtur alþjóðleg verðlaun

Arkitektastofan Arkitektur.is fékk á dögunum alþjóðleg verðlaun fyrir hönnun á byggingu Íþróttaakademíunnar í Reykjanesbæ. Mikil upphefð fylgir þessum verðlaunum en niðurstaða dómnefndarinnar verður kynnt í þremur útbreiddum fagtímaritum sem fjalla um menntamál og skólabyggingar.

DesignShare Merit verðlaunin eru veitt á alþjóðavísu af bandarískum samtökum sem leggja sérstaka áherslu á skólabyggingar og nýungar í kennsluháttum. Hönnun og notagildi byggingarinnar ásamt umhverfi vakti hrifningu dómnefndarinnar eins og umsögn hennar ber með sér.

Tengingin á milli rýma í húsinu vekur sérstaka hrifningu og allt útlit þykir mikið augnayndi. Dómnefndin er skipuð fagfólki í kennslufræðum og arkitektúr. Guðmundur Gunnarsson hjá Arkitektur.is neitar því ekki aðspurður að upphefð fylgi þessari viðurkenningu, ekki síst í ljósi þess að þrjú útbreidd fagtímarit munu fjalla sérstaklega um verðlaunabyggingarnar.

Það auki vissulega á hróður fyrirtækisins út á við og komi Íslandi á kortið hvað varðar faglega þekkingu og metnað í greininni.

„Það er vissulega gaman að fá það hrós sem felst í slíkri viðurkenningu. Við verðum vör við aukinn áhuga á því sem við erum að gera, sem sést m.a. á fyrirspurnum og aukinni umferð á heimasíðuna okkar. Í leiðinni er þetta líka heilmikil viðurkenning fyrir Íþróttaakademíuna og það sem hún stendur fyrir.