Íslandssími býður ADSL þjónustu í Reykjanesbæ

Íslandssími tilkynnti í dag að fyrirtækið ætlar að byggja upp ADSL kerfi með nauðsynlegum tækjabúnaði í Reykjanesbæ. Þar með er tryggð samkeppni á svæðinu á þessum ört vaxandi markaði fjarskipta. Ætla má að um 16.000 heimili og fyrirtæki séu með DSL háhraðatengingar við Internetið í dag og hefur þeim fjölgað gríðarlega á síðustu mánuðum. Fyrsta áskrift Íslandssíma í Reykjanesbæ var seld Árna Sigfússyni bæjarstjóra og sagðist hann fagna þessu skrefi Íslandssíma. Það hefði sýnt sig að aukin samkeppni, þar sem hún þrífst, hefði lækkað fjarskiptaverð og bætt þjónustu. Slíkt myndi án efa koma fyrirtækjum í Reykjanesbæ til góða ekki síður en íbúum á svæðinu.
Sala og markaðssetning á ADSL tengingum til heimila og fyrirtækja í Reykjanesbæ hefst strax og mega fyrstu notendur vænta þess að verða tengdir innan viku. Kerfi Íslandssíma mun ná til allra þéttbýliskjarna í bænum – Keflavíkur og Ytri- og Innri Njarðvíkur. Nauðsynlegur undirbúningur er hafinn og hefst uppsetning á tækjabúnaði innan skamms. Íbúar og fyrirtæki í Innri-Njarðvíkum og Fitjum, sem ekki hafa átt kost á ADSL tengingum til þessa, geta tengst kerfi íslandssíma frá byrjun októbermánaðar.

Íslandssími býður heimilum í Reykjanesbæ annars vegar ADSL II sem er 512 Kb/s tenging. Niðurhal innanlands er gjaldfrjálst og veittur er 20% afsláttur af erlendu niðurhaldi um kvöld og helgar af ADSL II. Hins vegar er heimilum boðin 256 Kb/s ADSL tenging. Auk ADSL þjónustu veitir Íslandssími heimilum hefðbundna símaþjónustu og farsímaþjónustu á eigin neti á Reykjanesi. Viðskiptavinum sem færa tvo þætti þjónustunnar til Íslandssíma býðst því 10% afsláttur af allri notkun, nema hringinga í 900 númer, og 15% afsláttur séu þeir með síma, farsíma og ADSL tengingu hjá Íslandssíma. Þessi afsláttur er til viðbótar öðrum sparnaðarleiðum og sérkjörum sem boðið er upp á. Fyrirtækjum bjóðast margvíslegir möguleikar á gagnaflutningum og annarri fjarskiptaþjónustu og augljóst hagræði að vera með alla fjarskiptaþjónustu á einum stað.

Íslandssími hefur boðið ADSL þjónustu á heimilismarkaði frá því í nóvember 2001. Uppbygging kerfisins hófst snemma árs 2001 og voru fyrstu fyrirtækin tengd inn á kerfið um svipað leiti. Fyrirtækið veitir í dag DSL þjónustu, þ.m.t. ADSL, á eigin kerfi um nær allt höfuðborgarsvæðið, Akureyri og innan skamms tíma Reykjanesbæ.