Innbrot í Höfnum

Lögreglu var í gær tilkynnt um innbrot í heimahús í Höfnum þar sem meðal annars tveimur fartölvum var stolið. Meintir innbrotsþjófar voru síðar stöðvaðir í Hafnarfirði og fannst þýfið í bifreið þeirra. Málið er enn í rannsókn.

Í gærkvöld var tilkynnt að eldur væri laus í bifreið við Bakkastíg í Njarðvík. Þar logaði eldur í númerlausri bifreið og virðist sem eldur hafi verið borinn að henni.

Þá kom upp eitt fíkniefnamál í afgreiðslu lögreglustöðvarinnar í gærmorgun en fíkniefnahundur frá tollgæslunni á Keflavíkurflugvelli sem átti leið um afgreiðsluna sýndi mikinn áhuga á manni sem þar var staddur og beið þess að verða sóttur. Í ljós kom að í öðrum sokki mannsins leyndist hassmoli. Maðurinn var handtekinn og sleppt að lokinni skýrslutöku.