Íbúafundur vill græna litinn af Njarðvíkurskóla

Íbúafundur Árna Sigfússonar bæjarstjóra Reykjanesbæjar með íbúum Njarðvíkur var vel sóttur í Njarðvíkurskóla í kvöld. Hátt í eitthundrað manns sóttu fundinn. Eins og á tveimur fyrri fundum Árna kynnti hann allar þær helstu framkvæmdir sem eiga sér stað í sveitarfélaginu. Auk þess var varpað framtíðarsýn bæjarins upp á sýningartjaldið. Í kjölfar þess var farið út í hverfistengdari umræðu og rætt um það sem gert hefur verið og/eða betur mætti fara í hverfinu.
Ágætar umræður sköpuðust eftir erindi bæjarstjóra. Flestar voru þær á sviði umhverfis- og umferðaröryggismála. Gangbraut á Njarðarbraut við Borgarveg fékk talsverða umræðu, enda hættulegt horn að allra mati. Fram kom á fundinum að hvorki verður grafið undir götuna, né brúað. Hins vegar er verið að vinna að tillögu að breytingu á legu götunnar frá Borgarvegi að Hjallavegi með tilkomu svokallaðs kirkjutorgs, minni umferðarhraða og meiri gróðri. Má búast við að ráðist verði í þá framkvæmd á næsta ári, að höfðu samráði við söfnuðinn í Ytri Njarðvíkurkirkju. Í sumar verður hins vegar haldið áfram við lagfæringar á útliti Njarðarbrautar frá horni Flugvallarvegar og að Sjávargötu, að undanskildum kafla framan við kirkjuna, skrúðgarðinn og Sparisjóðinn.
Litaval í málningu opinberra bygginga í bæjarfélaginu kom til tals á fundinum. Spurt var um það hvaða litur yrði á íþróttahúsi Njarðvíkur og jafnframt hvort ekki ætti að mála Njarðvíkurskóla í örðum lit. Var fundurinn sammála um að græni liturinn ætti að fara af Njaðvíkurskóla og einhver “smekklegri” kæmi í staðinn.