Í lyfjavímu á reiðhjóli

Maður einn var handtekinn í miðbæ Keflavíkur í gærdag, illa áttaður á reiðhjóli, en grunur lék á að hann væri undir áhrifum lyfja- og eða fíkniefna. Hann var vistaður í fangaklefa þar sem hann fékk að sofa úr sér vímuna.

Einn útafakstur varð á Reykjanesbrautinni í gærdag en þar hafnaði fólksbifreið út í móa. Flytja varð bifreiðina á brott með dráttarbifreið en ökumann sakaði ekki. Kvaðst sá hafa misst stjórn á bifeiðinni þegar hann var að stilla útvarpið í henni.

Tveir ökumenn voru kærðir fyrir of hraðan akstur í umdæmi lögreglustjórans á Suðurnesjum í nótt. Sá er hraðast fór mældist á 116 km/klst þar sem leyfður hraði er 70 km/klst. Annars var næturvaktin tíðindalaus að því er fram kemur á dagbók lögreglu.