Hvessir aftur með kvöldinu

Suðurnesjamenn hafa fengið allar útgáfur af veðri síðustu klukkustundir. Þegar þetta er skrifað rétt fyrir kl. 14 er dimmt él að ganga yfir en þar á undan var glampandi sól. Á hádegi var suðvestlæg átt á landinu, 8-13 m/s suðvestantil, en annars heldur hægari. Él sunnan- og vestanlands, en skýjað með köflum um landið norðaustanvert. Hiti víðast nálægt frostmarki. Veðurhorfur á landinu til kl.18 á morgun:
Suðvestanátt, 8-13 m/s og él, en heldur hægari og skýjað með köflum um landið norðaustanvert. Suðvestan 10-18 m/s með kvöldinu, hvassast suðvestantil og áfram éljagangur, en dregur heldur úr vindi og úrkomu nálægt hádegi á morgun. Hiti við frostmark, en frost 0 til 5 stig víða norðaustanlands.

Veðurhorfur við Faxaflóa til kl. 18 á morgun: Suðvestan 8-13 m/s og él, en 13-18 með kvöldinu. Sunnan og suðvestan 5-13 m/s síðdegis á morgun og stöku él. Hiti í kringum frostmark.

Ljósmyndin: Í gærkvöldi kom myndarlegt haglél og voru höglin á stærð við myndarlega sykurmola. Það varð ekki hundi út sigandi og fólk þurfti að hækka róminn þegar það var að ræða saman nálægt gluggum, því svo hátt glumdi í élinu. VF-mynd: Hilmar Bragi.