Hvarf af ratsjá í Keflavík í 1600 fetum

Flugvélin sem leiðað er að vestur af Reykjanesi er af gerðinni Cessna 310 en einn maður var um borð í vélinni. Hún hvarf af ratsjá flugturnsins í Keflavík kl. 16:11 en þá var vélin í 1600 feta hæð. Talið er að vélin hafi náð að fljúga í um eina mínútu eftir að hún hvarf af ratsjánni.

Neyðarkall barst frá vélinni á fjórða tímanum í dag og tilkynnti flugmaðurinn að drepist hefði á öðrum hreyflinum og hann ætti í erfiðleikum með að flytja eldsneyti á milli tanka. Skömmu seinna barst frá honum tilkynning um að einnig hefði drepist á hinum hreyflinum og vélin svifi í um sjö þúsund feta hæð.

Flugvélin fór frá Narsasuaq á Grænlandi í dag og var stefnan tekin á Keflavíkurflugvöll. Aðgerðarstjórn var virkjuð á Keflavíkurflugvelli, þar sem gert var ráð fyrir að vélin kæmi til neyðarlendingar vegna þeirra vandræða sem voru um borð. Viðbúnaður var á Keflavíkurflugvelli allt þar til staðfest var að flugvélin hafi farið í hafið. Á þeim tímapunkti tók Landhelgisgæslan yfir stjórn aðgerða, en lögreglan á Suðurnesjum mun þó fara með rannsókn slyssins.

Tvær þyrlur Landhelgisgæslunnar voru þegar sendar til leitar, ásamt flugvél Landhelgisgæslunnar. Þá var dönsk flugvél á svæðinu. Fiskiskip eru á leitarsvæðinu og þá eru varðskip og björgunarskipið Hannes Þ. Hafstein frá Sandgerði á leið á staðinn.