Hvað er forsætisráðherra að segja?

Steinþór Jónsson, bæjarfulltrúi og formaður áhugahóps um örugga Reykjanesbraut, ritar í dag grein á heimasíðu sína þar sem hann veltir fyrir sér hvaða sýn Halldór Ásgrímsson, forsætisráðherra hefur á tvöföldun Reykjanesbrautar. Grein Steinþórs fylgir hér í heild sinni:

Hvað er forsætisráðherra að segja?
Í  Morgunblaðinu í morgun er haft eftir Halldóri Ásgrímssyni, forsætisráðherra að bæta þyrfti aðkomuna frá suðri um Reykjanesbraut, þegar hann var spurður um mjög brýn samgönguverkefni! Þá hefur Halldór talað um mikilvægi tvöföldunar Reykjanesbrautar m.a. í áramótaávarpi sínu, sem hlýtur að hafa eitthvert gildi. Því vaknar sú spurning hjá mér í dag: Hvað er forsætisráðherra að segja með þessari yfirlýsingu um að bæta aðkomuna frá suðri? Gæti verið að hugmyndin að klára þann hluta brautarinnar sem eftir er í tveimur áföngum og þá þann sem nær er Reykjanesbæ í ár og hinn sem liggur með álverinu síðar? Er vandræðagangur yfirvalda í Hafnarfirði um tengingu við Reykjanesbraut ennþá að valda verkefninu töfum?
Nú styttist í borgarafund sem haldinn verður í Stapa þann 7. febrúar n.k. og hefur áhugahópurinn fært hann til vegna óska samgönguráðherra, Sturlu Böðvarssonar, sem vildi hafa eitthvað að segja á þessum fundi. Í ljósi ummæla forsætisráðherra í dag gæti niðurstaðan orðið að hluti þess sem eftir er verður settur í forgang og kláraður fyrst. Værum við sátt við þá niðurstöðu? Ljóst er að kaflinn í suðri, eins og forsætisráðherra nefnir hann, þarf að vera í forgang en ávallt hefur verið talað um að klára það sem eftir er í einu útboði. Mikilvægt er að skoða þetta mál vel og meta kosti og galla fyrir fundinn til að við sem um þetta mál fjöllum getum tekið afstöðu til þess ef þessi niðurstaða væri upp á borðinu.