Hvað á að gera við peningana frá „Frúnni í Hamborg“?
Samkomulagið sem náðist milli eigenda Hitaveitu Suðurnesja í síðustu viku hefur það í för með sér að gríðarlegir fjármunir munu koma inn á svæðið. Öll sveitarfélögin á Suðurnesjum hafa selt hluti sína, að hluta til eða í heild, til Geysis Green Energy og Orkuveitu Reykjavíkur. Á tímabili leit út eins og um pattstöðu væri að ræða.
Reykjanesbær vildi halda ráðandi hlut í fyrirtækinu og meirihlutinn í bæjarstjórn lagði áherslu á að fá GGE inn í fyrirtækið. Hafnarfjörður fékk OR til liðs við sig og valdabarátta innan fyrirtækisins var í uppsiglingu.
Tafir á afgreiðslu sölunnar, vegna þess, hefðu haft í för með sér tap fyrir sveitarfélögin þar sem fjármunirnir sátu enn í geymslum GGE og OR, en voru ekki að ávaxtast fyrir bæina í höndum bankanna.
Önnur afleiðing hefði verið sú að Reykjanesbær hefði þurft að vera sífellt að kaupa sér dýra hluti í fyrirtækinu, með tilheyrandi lántökum og greiðslubyrði. Það er því fagnaðarefni að málið skuli til lykta leitt með samkomulagi, en atburðarásin er afar umdeild og hafði minnihlutinn í Reykjanesbæ talsvert út á hana að setja.
Engu að síður er nú ljóst að merkistímar eru framundan á Suðurnesjum þar sem sveitarfélögin sitja nú á fullum kistum fjár. Væntanlega munu sveitarfélögin fyrst leitast við að greiða niður óhagstæðar skuldir, en víða er fjárfestinga þörf. Eftir uppbyggingu siðustu ár er víða orðinn skortur á skóla og leikskólaplássum og veitumál eru sumstaðar á dagskrá. Víkurfréttir höfðu samband við bæjarstjórana á Suðurnesjum og spurðu út í næstu skref.
Garður: 2.277 milljónir
Oddný Harðardóttir:
„Við byrjum á að setjast niður og skoða tilboð frá bönkunum um hvernig er hægt að ávaxta peningana. Svo förum við yfir hvaða lán borgar sig að greiða upp og hver ekki. En svo höfum við ekki ákveðið hvað við munum gera. Við þurfum að stækka grunnskólann. Það er stærsta verkefnið sem við stöndum nú frammi fyrir. Við höfðum líka ætlað okkur að leggja 20 milljónir á ári í veituframkvæmdir, en nú gefst okkur tækifæri til að vinna verk hraðar þegar þessir peningar eru komnir.
Við erum hins vegar öll í bæjarstjórn sammála um að ganga ekki á höfuðstólinn, heldur verða raunvextir, sem gætu verið um 150 milljónir á ári, notaðir. Við þurfum líka að sjá hvernig girðingu er hægt að reisa um sjóðinn því þó þessi bæjarstjórn sé ákveðin í að ganga ekki á höfuðstólinn þurfum við að sjá til þess að þannig verði það áfram.”
Vogar: 1.386 milljónir
Róbert Ragnarsson:
„Við erum ekki búin að taka endanlega ákvörðun um hvað verði gert í þessum málum, en við förum yfir það með ráðgjöfum okkar hvort við eigum að borga upp lán og þá hve mikið, en ég geri ráð fyrir að meirihluti peninganna fari í sjóð sem verður ávaxtaður.
Við gætum verið að fá einhverjar 130 milljónir á ári í vexti, eða um 10 milljónir á mánuði. Þessir fjármunir ættu að geta staðið undir afborgunum lána, leigugreiðslum og öðrum skuldbindingum.Við þurfum að fjölga leikskólaplássum, það er næst á dagskrá, og ég býst við að við byggjum nýjan leikskóla. Ef fjölgunin hjá okkur heldur svo áfram eins og hún hefur gert þurfum við líka að byggja við grunnskólann innan tíðar, en í vaxandi bæ bætist alltaf við það sem þarf að gera.”
Grindavík: 3,7-3,8 milljarðar
Ólafur Örn Ólafsson:
„Það hefur engin ákvörðun verið tekin um ráðstöfun fjármunanna, en í aðdraganda alls þessa, raunar fyrir ákvörðunina um kvótaskerðingu, voru allir bæjarfulltrúar mjög einhuga um að fjárfesta höfuðstólinn og eyða honum ekki. Við eigum hann inni og notum vextina sem yrðu verulegir, en það á eftir að ganga frá því. Það er annars mikið að gera hjá okkur, til dæmis þurfum við að fara að byggja okkur nýjan grunnskóla. Við erum komin langleiðina með að teikna og hanna fyrsta áfanga skólans, en það hefur engin ákvörðun verið tekin um hvenær við byrjum að byggja. Börnunum hefur ekki fjölgað jafn hratt og við reiknuðum með þannig að það er ekki jafn mikil pressa á okkur með það. Ég gæti ímyndað mér að við þyrftum að gera þetta innan eins til tveggja ára.
Við eigum eftir að skoða með skuldagreiðslur, en bærinn er ekki með mikið af langtímaskuldum og mér sýnist ávöxtunin af fjármununum gæti verið mun hærri en afborganirnar.
Það er ekki spurning að það var rétt ákvörðun að fara þessa leið, að selja hlutinn, miðaða við þær tekjur sem við höfðum af HS áður, en það var arður upp á 34 milljónir á ári og ég myndi vonast til að fá á milli 3-400 milljónir á ári af tekjunum.”
Sandgerði: 2,6 milljarðar
Sigurður Valur Ásbjarnarnson:
„Þetta fé var náttúrulega ekki inni í fjárhagsáætlun og næst á dagskrá er fundur í bæjarráði, á þriðjudag, þar sem farið verður yfir stöðu mála.
Þetta fjármagn er það mikið að hægt væri að borga skuldir bæjarfélagsins nánast þrisvar sinnum og þar af leiðandi er nægilegt fé til að gera ýmislegt, en það hefur engin ákvörðun verið tekin um það hvernig við ætlum að verja þessu fjármagni því það er svo nýtilkomið. Tilboðið sem við fengum í hlutinn var það gott að það var ekki hægt annað en að skoða það í þaula og leyfa þeim íbúum sem hafa látið þetta fjármagn verða til, njóta þess með einhverjum hætti og
það er næsta verkefni bæjarstjórnarinnar.“
Reykjanesbær: 2,5 millljarðar
Árni Sigfússon:
Við höfum ekki tekið mikið út úr Hitaveitunni því við eigum enn átján og hálfan milljarð inni í fyrirtækinu. En við munum nota fjármunina til að greiða niður óhagstæð lán og getum væntanlega ávaxtað fé, en við erum að skoða þetta nánar með okkar fjármálaráðgjöfum.
Íbúum er að snarfjölga hjá okkur þar sem við erum að fá aukin fasteignagjöld og útsvar til að standa undir aukinni þjónustu og bættum aðbúnaði en þessir fjármunir munu léta undir með okkur. Það er engin spurning.
