Hundur strauk úr flugi á Keflavíkurflugvelli
– víðtæk leit á Miðnesheiði
Lögreglan á Suðurnesjum ásamt hundafangara og björgunarsveitarfólki af Suðurnesjum leitar nú að hundi sem slapp úr búri á Keflavíkurflugvelli í morgun. Hundurinn hljóp út af flugvallarsvæðinu og á Miðnesheiðina.
Hundurinn var í búri sem féll á hliðina og opnaðist. Þar með tók hundurinn, sem er svartur Border Collie með hvítum flekkjum, til fótanna og var frelsinu feginn.
Sést hefur til dýrsins en erfitt er að nálgast það.
Óskað var eftir aðstoð frá björgunarsveitum í morgun við að grennslast fyrir um dýrið sem er óæskilegt í íslenskri náttúru, enda erlendur hundur sem þarf að fara í gegnum sóttkví áður en það getur dvalið frjálst hér á landi.
Hvar er hundurinn? Leit stendur yfir á Miðnesheiði. VF-myndir: Hilmar Bragi
