Hundur beit hundafangara
- leikskólabörn komust ekki út
Lögreglunni á Suðurnesjum barst í fyrradag tilkynning þess efnis að Schaeferhundur væri laus á vakki fyrir utan leikskóla í umdæminu. Væri hann ógnandi og ekki þorandi að fara með börnin út úr húsinu undir slíkum kringumstæðum.
Haft var samband við hundafangara sem fór á staðinn. Hann kallaði á hundinn, sem kom þá askvaðandi að honum og beit hann í höndina. Hundafangarinn náði að hrista hundinn af sér og kallaði síðan til annan hundafangara. Tókst þeim að handsama dýrið. Málið var tilkynnt til Heilbrigðiseftirlits Suðurnesja, sem tók það í sínar hendur.
