Hundar í sviðsljósinu í Grindavík
Enn fjölgar í hópi hundaeigenda og hunda sem hittast á miðvikudagskvöldum á grasblettinum austan við bæjarskrifstofurnar. Matthías Örn Friðriksson knattspyrnukappi hjá Grindavík býður upp á ókeypis leiðsögn og hefur þátttakan vaxið jafnt og þétt og voru um 20 hundar mættir í gærkvöldi.
Matthías gekk á milli og aðstoðaði fólk með hundana. Æfingin gekk ótrúlega vel þótt einstaka hundur hafi verið eitthvað æstur í byrjun. Allt fór vel fram og ríkir mikil ánægja á meðal hundaeigenda með þetta framtak Matthíasar.
Rétt er að taka fram að nú stendur yfir sérstakt átak í skráningu hunda og katta í Grindavík. HES býður ókeypis árgjald út árið 2013 á nýskráðum hundum og köttum séu dýrin skráð fyrir 30. júlí 2013.
Ábendingar um óskráða hunda og ketti eru vel þegnar með því að senda upplýsingar á netfangið [email protected]. Í sumar munu starfsmenn á vegum Grindavíkurbæjar og HES ganga hús úr húsi og kanna hvort skráin sé uppfærð.
grindavik.is
