Hrefnur í miklu æti undan Njarðvíkurhöfn

Nokkrar hrefnur sáust nú undir kvöld í nokkuð góðum málum í æti undan höfninni í Njarðvík. Sjónarvottur sagðist hafa séð a.m.k. um fimm dýr. Ljósmyndari Víkurfrétta fór á staðinn og sá nokkur dýr sem virtust vera í æti. Mikið var af fugli á svæðinu og hrefnurnar voru greinilega að taka vel til matar síns, þar sem þær syntu í hringi á svæðinu. Mátti sjá bakugga koma upp á yfirborðið á stóru svæði, svo ljóst er að þarna voru nokkur dýr á ferðinni. Hins vegar var erfitt að komast í návígi við dýrin, þar sem Njarðvíkurhöfn hefur verið girt af og því ekki mögulegt að komast nærri þeim stað þar sem hrefnan hélt sig aðallega, undan nýja sjóvarnargarðinum við fraktskipabryggjuna.

Mynd: Þessari ljósmynd náði ljósmyndari Víkurfrétta af einni hrefnunni nú undir kvöld. VF-ljósmynd: Hilmar Bragi Bárðarson